Wassergeburt

ÄngeliÄngeli

215

bearbeitet 23. 05. 2019, 16:18 in Geburt
WASSERGEBURT
Wer hät das gha? Chönder mir chli verzelle wie das ablauft & wie ihr das erlebt händ? Würeders wieder mache? Isch mer det bis ganz am schluss im Wasser? Oder muess mer use bevor s‘baby chunt?

Kommentare

  • Ohhhh da liesi so gern mit. 😍Ich wünschmer au eh wassergeburt. Git luut minre fraueärztin au viel weniger dammriis oder alles andere wo riise cha😅 aso mer cha bis sbaby da isch ide badwanne si😍Ha negscht wuche es hebammegspröch und frag sie den auna us🤗 chan den na brichte😬
  • Hello :-) Also ich glaub da isch jedi Frau sooo andersh! Ich ha scho immer unbedingt e Wassergeburt welle und has ner oh so chönne ha dasi e Badwanne im Gebärsaal ha kha und Entspannigsmusik etc. Wo d‘Wehe agfange hei beni aber no nid im Wasser gsi aber sobald ich im Wasser bi ghocket, isches nume no SCHLIMM gsi. Han irgendwie sehr starki Wehe kha und der Schmerz und alles überhaupt nid chönne stüre. Ha ner nur no usse welle.
    ir hei oh vieli gseit, me sig entspannter und und und aber mini FA het mer scho vo afang ah gseit bir 1 Geburt selli nid NUR uf Wassergeburt setze obwohl is mer wünsche sondern eifach während der Geburt spontan entscheide & das hani oh richtig so gfunde. Es git sicher oh fraue wo sech im Wasser wohl gfüehlt hei aber ich leider überhaupt nid!
  • Ich ha mer ide schwangerschaft ganz fest e wassergeburt gwünscht, am beste no dass min mah mit id wanne chunnt. Ha da scho genau mini plän gmacht, wies perfekt söll ablaufe. Wos denn aber sowiit gsi isch, hetti nüt weniger welle als i die wanne inestiege 🤣 d tochter isch denn prima und schnell „an land“ ufd welt cho.
    Ich wür mer sicher die option offe halte, aber mich nöd zu fest uf opis verstiife. Meistens chunnts eh andersch als mer sich das vorgstellt het.🙈
  • ich ha beidi chind im wasser becho. ha mich sehr wohl und treit gfühlt im wasser. ha bide erste geburt alles ih allem über 30h gha und ha am namitag zerst 2h im wasser gschlafe, dänn an land gsi für 4h und dänn fürd geburt wieder is wasser. s‘baby hani dänn ufd bruscht gleit becho, bi drin bliebe bisd plazenta cho isch und erst nacher usegstige.
    bim zweite ischs so schnäll gange, bi ahcho, grad id wanne und au da wieder bisd nachgeburt cho isch und erst dänn use. dusse händs dänn gluet wäg rissli und obs münd nähe - was bi mir bi beidne nöd dä fall gsi isch. für mich ischs wückli es schöns erläbnis gsi.
    bim erste bini mega kaputt gsi, aber paar stund im wasser händ mir dwehe liechter gmacht und ich ha chöne schlafe zum energietanke. s‘weite isch ä sturzgeburt gsi und ich bi froh gsi woni äntli ahcho bin und is wasser ha chöne. wäni an land gsi wer, weisi nöd öb sie öper het möge uffange - sie isch richtig usegspickt, dä hebamme grad durd händ gflutscht😅
  • natalie schrieb: »
    Wos denn aber sowiit gsi isch, hetti nüt weniger welle als i die wanne inestiege

    Dito😂😂😂 hetsch mich is wasser ta, ich wer glaub usgraschtet. und ich liebeee wasser und ha unbedingt e wassergeburt welle. aber ich stells mer au ganz „schön“ vor
  • Ich han mir das au mal überleit. Han aber komplett alles offe lah, weisch ja echt ned, wies der i dem Moment gaht. Wos de sowit gsi isch, bini froh gsi, hani chöne umelaufe... und woni so nöch dra gsi bi, het mi glaub nur dn Chrane id Badwanne bracht... aber stells mer au hüt na schön vor...
  • I wet au e Wassergeburt wenns gaht natürlich.. chan mir guet vorstelle dases d schmerze chli dut hemme und ahgnehmer isch.. 🙈
  • Bir zweita Muus bini dia ganz Ziit ir Wanna gsi, am Afang hends immer wieder warms Wasser innaloh und am Schluss bini froh gsi, wos küahl gsi isch. Hets warm nümm möga verliida. Sie hend miar in dr Wanna au d Blosa gstocha und en Dammschnitt gmacht.
  • Würd eu offe la, hetti eu gärn i Wanne welle. Tja mini Muus isch aber den so schnäll cho, diä hent Wanne gar nit kenne fülle🙈🤣
  • I hätts ou welle.. aber ha ke zyt meh gha.. mini muus hets sehr pressant gsii🤪🤪 i würs in betracht zieh aber wür mi net zfest drufistelle😊
  • Ich han alli 3 Chind im Wasser gebore. Bim erschte bini ca 1 h 15 min im Wasser gsi, bim 2. knappi 10 min (hät grad no knapp glanged) und bim 3. ca 40 Min. Bi mir isch s‘warme Wasser s‘beschti Schmerzmittel gsi. Ich has vor de erschte Geburt nie ernsthaft in Betracht zoge, es isch dänn eher zuefälliger wis so cho..
  • Dänke mi muesses usprobiere. Mir hets d Schmärze guet glinderet. Bin erste Ching bini 6 Stund nonstop im Wasser gsi😄es Fischli sozsäge u bir zwöite no gad 10 minute... isch so schnäu gange
  • Ich hätt gern wele, aber da sie es Früehli gsi isch, hani nur chli dörfe im Wasser veratme. Binere nöchste Geburt wird ich allerdings e Wassergeburt ahstrebe - sofern das denn gaht😊 Mir isches sehr wohl gsi und ich han mi au so suber und nöd so verschwitzt gfühlt 😂
  • Ich hät gern e wasser geburt ka bi denn au bim erste ind wanne ine aber ha mi leider nit entspanne könne bi mir hets leider nit so gwirkt ha heftigeri wehe ka und ha mi nit richtig hebe könne bi selber halb gschwumme und denn bini wieder use und ha ganz normal im gebärstuel gebore.
    Beniede alli wo das hei chönne mache wär immer min grösste wunsch gsi
  • Mir isch äs wiä ar @crazymum gangä. I ha ou ids Wasser wellä, ha mi ou nid chönnä entspannä i ha usä müessä, has nüm usghaltä ir Wannä
  • mini schwöschter het e wasser geburt gha, ich bi debi gsi ha ihri hand ghebt☺️. also si het das net planet gha,si het wehe gha de hend si gfrogt ob si evtl. ins wasser will bez go entspanne duet villech guet..und denne im wasser het den de geburt statt gfunde😆..! si het gseit si will nöchschtmau ufjedefall en wasser geburt ha,es sig sehr agnehm gsi im wasser. schinz isches für s‘baby au agnehm erscht ins wasser ine.
  • Ich ha au eh wasser geburrt wele ... 🤔 dWannä wer parat gsi aber mini tochter isch zschnell cho .. ha drumm eh sturz geburrt gha .. aber filicht de bim 2te 😁 wens ned no schnellet gaht .. oder ich sitze scho 2 wuche vor ET id wannä 😁
  • Ich han 2 Wassergeburte kha es isch entspannender für d Geburt au wänn me d Wehe hät ds Baby chunt im Wasser uf d Wält Ich han beidi Mini Chinder mit de Wassergeburt uf d Wält brocht es isch für Mich mege schön gsih au ebe vill entspannender durch ds Warme Wasser wo d Wehe eifacht es biz erträglicher macht...
Hey! 1 Frage - 100 Antworten!
Im BabyForum kannst du dich einfach, sicher und anonym mit (werdenden) Mamas und Papas in deiner Nähe austauschen. Registriere dich jetzt, um alle Bereiche zu sehen und mitzuplaudern:Kostenlos registrieren

Social Media & Apps

Registrieren im Forum