Einseitiger Kinderwunsch 👶

Hallo zämä.
Ich sueche fraue wos glich ergot.
Ich bin 26gi und han sit guet 6 johr en Kinderwunsch wo mitlerwile so starch isch dasi a nünt anders meh denke cha..
min Fründ au 26gi ( sind sit 7 johr zeme)
will au Kind, aber nöd gad jetzt. er schiebts immer witer usä alles rede nützt nünt. Er isch eifach nonig parat defür..
Jetzt suechi öbert oder au mehreri wos au eso ergot zum sich ustuschä.
wür mich mega freue wenn sich öbert findä wür. 😊

Kommentare

  • Hallo @Jani
    Ich ka dir so noche fühle🙈 ich bi mitm Partner sit 10 Joor zämme,ha mit 23(bi jetz 31)au dr erscht Kinderwunsch kha. Natürlich het mi Partner kei Freud kha,sig jo no viel zfrüeh... ha immer wieder gueti gspröch mit ihm kha... ha denn aber irgendwenn gseit dass wenni mit 30 nid mis 1.Kind ha,möchti gar keini kinder... mit 28,hänn mir denn nüm verhüetet. Denn bini 30 worde und ha d hoffnig scho ufgäh und dänkt,jänu denn isch es halt so.. und zack bini schwanger worde und no mit 30 hani mis kleine Wunder in de Ärm kha👶
    Ich möcht dir sage,du bisch nid elai,red viel mit dim Partner und überleget euch wo euri gmeinsami Reis anegoht. Was für Bedürfnis het er,welli hesch du... rede bringt viel🥰
  • Gratuliere dir zu dim Wunder 🥰
    mir reded sehr viel drüber, bi ihm s problem isch er wür gern ufs Land züche und da will er befor mir Kind krieged, nur mir suched jetzt sit 1 johr und da deprimiert. deswege suechi Fraue wo bizli mitfühle chönd min Fründ cha da nöd so nohvolzieh wies i mir usgseht egal wie oft ich ihm da sege. heti eifach gern öbert wo mich genau verstoht wür mir glaub au guet due.😊
    und ich danke dir für dini Antwort du gisch mir bizli hoffnig ☺️
  • Bi üs isches au so gsi. Ha relativ früeh i üsere Beziehig e sehr starke Kinderwunsch gha. Ig bi denne 23 gsi. Mi Maa (denne no Fründ) het nüt vo dem welle wüsse und het gseit bevor er 30 isch müessi gar nid cho mit dem Thema und er welli sowieso zersch hürote bevor mer Chinder züge. Ha lang drunder glitte ha mer jensti Gedanke gmacht wie ig ihn dezue chan bringe 🤷🏼‍♀️ es isch sehr frustrierend gsi, ha sehr oft brüelet deswäge. Irgendwenn nacheme zitli hanide entschluss gfasst e Witerbildig azfoh zum mi Ablänke. Het super funktioniert. Woni de 26i bi gsi heimer ghürote und i dem Johr heimer üs de au ad Kinderplanig gmacht. Im nachhinein bini sehr froh heimer no so lang gwartet gha, aber i dem Moment wo dä Kinderwunsch so gross isch, verstoht me das nid. Vorallem villi Männer hei dä wunsch nach Chind vill spöter als mir Fraue. Ig würd eifach nid vill druck mache und probier di mit öbbisem abzlänke, witerbildig, hobby etc. Und wer weiss, vilicht scho sehr bald, findet ihr üchi Traum Wohnig/Huus und chönnet üche Traum vom gmeinsame Kind verwürkliche 🥰 gib d Hoffnig nid uf ❤️
  • Hallo
    Ich verstah guet wes isch mimne unerfüllte Kinderwunsch. Bi üs hets chli en andere grund gha ( es het 2.5 jahr nid klappet) drum chames evtl nid ganz verglichä. Ich will dr nur säge dases fürd beziehig en extremi belastig chan sii. Plötzlich zwieflet mä vilicht obs dr richtig partner isch. Bi üs au churz soo gsi. Mier hend den viel gspräch gfüehrt und versuecht use z gfinde wie üse wäg susch chönt usgseh. Ich han gmerkt dases nid sälbstverständlich isch en partner z ha wome liebt. So hani ihn viel meh schätze glernt. De richtig partner zha und mit ihm glücklich z sii isch es grosses glück. So hani eifach die ziit zäme afe gniesse, die sache wome mit chind nid so macht. De wunsch isch plötzlich in hindergrund grutscht. Den het sich im summer plötzlich iisers wunder inegschliche und ez darfi schwanger sii. Wasi damit will säge isch, mä muess de fokus nid uf das legge wome nid het sondern uf das wome het. Weme das chan, bini überzügt das alles anderi wie vo sälber i diis läbe chunt. Aber weme nur im Mangel läbt, gahts dier nid guet, diim partner nid und ücheri beziehig liidet sehr da drunder...
  • I kenns o aber uf di anderi Siite. I bi 25 gsi woni mit mim Maa bi zämmecho und är hät am liebste grad agfange 🙈 i ha denn nonid mau gwüsst obs für mi e richtigi Beziehig isch 😅 mir hei denn viu drüber gred und är het mir würklech zGfühl gäh daser mit mir wott zämme si und mi nid us Gebärmaschine gseht, das het mir sehr ghulfe. Chli meh aus 2,5 Jahr speter heimer üsi ersti Tochter gha und denn nomau guet 2,5 Jahr speter di Zwöiti und es isch di richtigi Entscheidi gsi. Respektieret d Meinige vo öine Manne, gäbed ihne zGfühl meh zsi aus e Samespender u steuet öich glich nid zu fest zrügg. Schwierig i weiss aber i ha gueti Erfahrige gmacht mit dere Istellig ☺️
  • Nöd falsch versto ich wür min Fründ niä zu nebisem zwinge ☺️ ich han eifach denkt es git do inne eventuell Fraue wos glich got, eifach zum sich bizli ustusche und enand uf anderi gedanke bringe. Fraue verstönd die ganz thematik halt bizli besser weder d manne 😋
    aber es isch schön z lese was ihr für erfahrige gmacht hend mit dem ganze thema 😊
  • Ah so hanis nid verstande 😇 alles guet, ha nur wöue zeige das o mir Froue mängisch nonid so wiit si 😂👍
  • Bi euis isches leider bim zweite au eso dass mir euis nöd einig sind. Ich het sehr gern es zweits aber min Ma nöd 😔 finds u schwierig zum dämit umgah.
  • Ja bis zu üsere tochter hani 6 Jahr gwarted und jetzt wäre wider für es 2ts 🤣 aber er meint es blibt so ... Sie säg gnueg für ihn ... hoffe mal das sich sini meinig na änderet 😢 also meh als 4 Jahr unterschied woti ned
  • Und was machet ihr? also reded ihr mit euem mann regelmässig oder düend ihr de frust i eu inne fresse?
  • Mir händ x mal drüber gredt aber mir chömet halt nöd wiiter, es git ja wie kein Kompromiss i däre Sach 🤷🏻‍♀️ also ja wortwörtlich friss ich de Frust i mich ine, +5kg 😭 ich weiss würklich nüm wiiter und zwiifle au öfters starch a de Beziehig
  • Jo da stimmt git würkli kein kompromiss..
    und da mit em frustfresse kenni au 😔
    aber i denke zwiefle a dä bezihig isch au nöd gad s beste
  • Nei natürlich isch das nöd s‘beste aber es isch au nöd s‘Best wänn öper so öpis wichtigs eifach ällai für sich entscheidet 🤷🏻‍♀️
  • Da stimmt natürlich. mir isch au scho trennig dur dä kopf.
    und natürlich sött mo sone thema nöd allei entscheide
  • Mir rede ou scho sit jahre i ha mi iz de zu etnschlosse mit ihm z rede und ihm ou nõch z bringe mi cha nid dr perfekt momänt ab warte es git ke perfekt momänt für es chind und mini i stellig isch wenn s pasiert de passierts. Bi iz am 1 ū z
  • @Rousi D häsch demfall scho mit ihm gredet das du ez im 1. üz bisch?
    ich find da immer mega schwer das thema ah zschnide min fründ hed au s gfühl s git dä perfekti ziitpunkt. und i ha ihm scho oft gseit es wird immer öbis dezwüsched cho..
  • Mir hend au di gliich situation mitm 2te chind. Nachm erste het er ned welle für e willi und isch ned bereit defür gsii. I ha s thema immer wieder agschnitte und drüber gredt, willi ned en grose abstand ha welle. Geduld hets bruucht und ha ihn au verstande. Ez wo üsi tochter 1.5 jahr alt isch chan er sichs au vorstelle, aber weg de jetztig unsichere situation wartet mir no e paar mönet zue. I ha au mega müeh mit de situation, aber es hilft mi mit andere sache abzlenke, au wenns immer wieder eifacheri und schwierigeri tag git. Kommunikation und aber au geduld und verständnis vo beidne siite het üs gholfe. Denke üsen ziitpunkt chunnt au no.
Hey! 1 Frage - 100 Antworten!
Im BabyForum kannst du dich einfach, sicher und anonym mit (werdenden) Mamas und Papas in deiner Nähe austauschen. Registriere dich jetzt, um alle Bereiche zu sehen und mitzuplaudern:Kostenlos registrieren

Social Media & Apps

Registrieren im Forum