Nachbar reklamiert wägä ching

bearbeitet 10. Januar, 13:56 in Plauderecke
Jtz isch scho ds zwöite mau üse nachbar wo obä dranne (alleinstehend) cho reklamiere wüu mini ching ( 2&4) ds lut sigä. Öbs ihnä nid guet göngi? Das sig ja nid normau wi viu diä grännä u zwängä ( är ghöri da dr ungerschied) was i da chöng ändärä dases besseret? Är sig im homeoffice u füeuht säch sehr gstört. I ha nä gfragt öb är keni chopfhörer heig, u är mou aber di wöug är nid dr ganz tag anne ha…i füehle mi grad sehr trurig u betroffe obwou i weiss das mini ching normau si us vo mir us gseh nid ds lut u ds wiud isch bi üs, aber das so gseit über ds cho macht mi grad chli fertig…öper ä tipp wi i mit derä situation u mit däm typ söu umgah?

Kommentare

  • Sorry, aber dä Typ isch nid ganz putzt. Ä gwüssä Lärm isch normal u muess dürä Tag toleriert wärdä.
    Ig würds ignoriärä. Ha äs zittli ou so ä Nachbar kha. Zum Glück isch är när uszogä. Nid trurig si, müehsami Lüt gits überall.
  • Aww ich ha mal es ähnlichs problem ka. Mir hend nochbure ka undedra wo sgfühl ka hend üsen sohn dörfi ab de 19uhr nix meh spiele will dene ihri tochter denn is bett gschickt worde isch und so ned hett chöne ischlafe. Ich ha mir en megaaaa chopf drum gmacht. Alles hett nix gnützt min sohn isch immer zluut gsi für sie. Sie sind sogar zu de verwaltig grennt 🤣 zum glück sind denn die hinder üs gstande und hend ihne klargmacht das 19 uhr no kei ziit isch zum nachtruhe schreie.
    Mir sind weg dene noch 17 mönet wieder züglet. Au wenn ich weiss das SIE sproblem gsi sind.

    Was hett dir din nochber für en Lösig vorgschlage? Genau nüt.
    Du muesch dini Chind ned ruhigstelle nur will de Monsieur HO hett. Nachtruhe isch abem 10ni. Geg Kinderlärm chamer nix mache. S'Gsetz staht ganz klar hinder dir, falls es di bitz ufmunteret.
    Wenns en so stört söll er zügle.
  • Ich weiss wie du dich fühlsch. Vor öpe 1 monat het nachbarin unter eus reklamiert will mini chind ( 2 jährig) zlut seged. Sie het ned bi mir direkt reklamiert sondern bim vermieter wasi ebe no dümmer finde. Ich ha sie druf agsproche, sie isch Psychologin und het mer visitekärtli geh vonere Kinderpyschologin. So quasi dini chind sind so lut das sie zum Psychiater müend. Ich ha ihre erklärt das ich de Aus-Knopf bi minere chind nonig gfunde ha und das verhalte vo minere chind isch völlig normal. Sie seit mer sit dem nödemal meh grüezi aber das isch mer glich. So reklamatione chömed meistens vo lüt wo ebe kei Chind hend. Rein rechtlich gse cha dich weg Kinderlärm keiner useschmeisse, au ned wenns während de mittagszyt oder allgemeini ruehzyt isch.
  • Auso ig bi imene sehr aute Block ufgwachse, wome wück de Furz vom Nachbar würd ghöre. Aber i cha mi nid erinnere jemaus e Reklamation becho z ha. Zumau mir 3 ching si gsih. Aber i gloube mir si ou nie lüt gsih u wück immer dusse. Item, mini eutere wohne no immer dert u i muess säge was sie zum teu erläbe dert isch HORROR. Chlini chin wück öppe im auter vo dine wo am abe am 11i immerno umeschreie u stampfe u tüe wie vom tüfu bsässe und das geit mire meinig nache z wit. Sie hei sogar scho müesse polizei la cho wüus oscho am morge am haubi 1 so lut gsih isch und nid am wuchenänd sondern under de wuche. Aber d chin verstöh ja das nonid und d eutere chöi das de ching nid vermittle, dasme das haut so nid macht. Mini eutere si ono abwart im block u das träppehuus gseht mängisch us vo däne ching..schrecklich. wück haub ahfangeni Quetschies am bode, schoggi papierli, steine überau vertiut, süessi Getränk wo ihne a bode gheit isch wird nid ufputzt..etc. aber schlussendlich lehrt z ching das nid vo säuber und de müesse d eutere haut das vormache.

    Nichts destotrotz, we är sich soo gstört füuht söuer doch wieder iz Büro ga schaffe, chin blibe ging chin aber evt. Chöiter ja zämme e wäg finde, dass aui parteie u friede si...

  • Danke für öii ufmuntärndä wort, äs geit mir wider besser u i cha mittlerwile sogar drüber lache…

    Mir si zu ganz normale zit „lut“, am morge öpe vo dä achti a, übere mittag schlaft dr chliner mind. ä stung, somit si dr grösser u i o ruhig u am abä si si churz vor dä achti im bett u o stiu. Klar grännä si öpe diä i dr nacht, aber viu schlafe si düre

    I cha mir scho vorsteue dases cha närvä äbä grad wemä säuber ke ching het aber d art u wis wi är mit mir gred het isch eifach völlig drnäbä, är häts ja aständig chönne sägä…aber äbä, was söui mache? I gseh ke lösig wi mini ching ruhiger wärdä u i ha o dr aus chnopf no nid gfunge wi du dina, übrigens mega krass wägäm visite chärtli😳 äs git scho eifach frächi lüt uf derä wäut
  • Oje, mir hend das au gha. Si hend denn sogar agfange ois drohendi Brief in Briefchaste z tue und so🙈 Min maa het au de Polizei aglüte. Ich weis, chind sind chind und je nach phase chamer meh oder weniger mache. Bis zumeme alter verstönds es gar nöd…. Solang mer si nöd mitem Bobbycar, trampolin und so witer i de wohnig spile laht ischs minere meinig nah unvermidbar. Leider hets mich trotzdem belastet, au wenn das all seged. Ich bin immer zäme zuckt wenn min sohn mal öpis „lüters“ gmacht het. und demit meini mal umespringe oder schreie. 🤷‍♀️ mir sind umzoge und ich bin sooooo erliechtered gsi. 😏
Hey! 1 Frage - 100 Antworten!
Im BabyForum kannst du dich einfach, sicher und anonym mit (werdenden) Mamas und Papas in deiner Nähe austauschen. Registriere dich jetzt, um alle Bereiche zu sehen und mitzuplaudern:Kostenlos registrieren

Social Media & Apps

Registrieren im Forum