Tipps Kaiserschnitt mit 3,5 Jährigem Kind

BAS

Händ ihr tipps? Mir werdet ned gross unterstützig ha vo de familie u sind recht uf eus allei gstellt.
Händ ihr erfahrige oder tipps?

AnDu88

ig cha dir nur dä Tipp gä, dass nid alles perfekt muesch ha dehei, immer schön langsam mache und eis nachem andere...kei stress mache und mol halt beidi Auge zuedrücke im Bezug zum grössere Chind
Am Afang hani alles welle perfekt ha und au im Umgang mitem Gross, alles unter ei Huet z bringe isch am afang scho grad e bitz e herusforderig au d Ufmerksamkeit wos grössere Chind brucht.
Mini Hebamme het mi denne super Begleitet und het gseit gha, sträng si mitem grössere chasch i 3 Wuche de immerno. De luegter halt bitz meh TV oder het bitz meh freiheite wie normal....das pändlet sich de alles wieder ii wenn e Routine hesch mitem Baby.

Bi üs hets zur Afangszit öfters Zmorge/Zmittag vorem TV gä :-P Mi Bueb isch bir Geburt glich alt gsi wie dis erste Chind.

Miette

Min chli isch biz meh als 2.5 jahr alt gsi. Wo die chli per Buchgeburt cho isch. Min fründ het nach 4 täg wieder muesse ga schaffe & ich bin paar mal elei gsi. Ich han ih dere ziit eifach gluegt, dass mier & de zwei chline guet gaht 😉.

Mier hei vorgäng es paar gricht igfrohre (lasagne, älplermaggrone, suppe, brot) & tiefchüeler gfüllt (pizza, fischstäbli, crocette, gmüess). Hei mier die erste 2 wuche nit muesse ga ichaufe. Und susch hani mier zer geburt halt lieferguetschine gwünscht (wenn jemand gfragt het) 😉. Hauptsächlich het min fründ kochet. So hani kuchi ganz chänne abgä. Zfrüehstuck hani z.b. immer am vortag zweg gmacht, dasi morge nit so ine stress bi cho mit zwegmache.

Hushalt hani nur znötigste gmacht & natürli het min fründ es paar chlini sache uberno. Aber immer morge 30 min max.

Wier hei zglück en garte zha & de simer halt jede tag mind. 1h vorusse am spiele gsi, bi jedem wätter, daser sich cha ustobe. In der ziit hets baby gschlafe & ich han mich zu 100% mim chli chänne beschäftige. Susch heimer halt mal tauge zue drückt & er het tärfe TV luege zwischedurch. We min fründ deheime isch gsi, heder dem chli eifach „exklusiv zit gwidmtet“.

Ich han au versuecht schnell en routine ine zbringe & en möglichst gliche tagesablauf, vor allem für de gross. Het jetzt bi üs super klappet.

Die chli hani seeeehr viel treit oder im chinderwage gha.

Mos hauptmotto isch ih dere ziit eigentli gsi: mut zur lücke 😉

snowangel

Schliesse mich au ah a dene zwei mamis. Wassi no gmacht han isch ich han de grosse dra gwöhnt dassi ihn nüme gross lupfe scho während Schwangerschaft.
Ich ha au de fehler gmacht alles blitzblank putzt vor d geburt, alles für dxhatz gsi, mitmene chline chind und nachmene operation isches schwierig alles suber zbhalte. Esse vorchoche oder bstelle isch de hit 🙏😁
Ich han de grosse gla alles uspacke.. legos,.isebahn, autos.. ufgrumt hanis langsam mitem partner am abig gmacht 🥰 ich ihn vor dgeburt es hüsli us karton baut und det hani liechtli ine ta und da ischer amigs mit popcorn dine ghockt und het pawpatrol marathon gmacht woner mal nöd het welle spiele... 🤣🤣🤣 Aber ich ha mich im gegesatz zu de erst geburt extrem schnell wieder fit gfühlt. Ich denke s erste chind tuet psychisch mega smami fordere.. also guet gmeint. 🥰 Luegsch emal machsch der eifach kein Druck, du machsch das sicher guet ❤️

BAS

Tönt guet, danke viel mal für eui tipps. Händer au scho ghört dass es hushaltshilf git vo de krankekasse?

AnDu88

@BAS Ja das hani au scho ghört aber nur im zämehang mit Mehrlingsgeburte.
Kollegin het nach ihrem erste Chind Zwillinge becho und si het e Hushaltshilf becho füre Afang.

Bibi83

ich ha jetzt die andere tipps ned gläse. aber din FA sell dir s Rezept mache für e Huushaltshilf. Ich ha d Spitex gha wo mir 1x pro Woche s Huus putzt hend. Du chasch mit ihne s pflichteheft mache was du bruchsch. au wösch umeträge uf ufhänke- halt alles was schwär isch für dich am afang.

BAS

Also vorallem putze düends oder wie?

Mamelo

Bibi83 schrieb: »

ich ha jetzt die andere tipps ned gläse. aber din FA sell dir s Rezept mache für e Huushaltshilf. Ich ha d Spitex gha wo mir 1x pro Woche s Huus putzt hend. Du chasch mit ihne s pflichteheft mache was du bruchsch. au wösch umeträge uf ufhänke- halt alles was schwär isch für dich am afang.

Hani so jetzt nonie ghört, au wenn de Maa no deheime esch?

Cool gets da

Bibi83

@Mamelo ja es lohnt sich bi de Chrankekasse azfröge. De FA mues es eifach verschribe. und ja- au wenn de Maa dehei isch. Bim 2. Kaiserschnitt isch mini KK na „offner gsi“ ich ha deht 12 wuche d spitex gha 4h pro Wuche. jetzt bim 3. KS hani d spitex na 8 wuche gha 2 stund pro wuche. aber jedi KK handhabt das andersch. @BAS ja aso bi mir isch d Spitex cho als Huushaltshilf zum putze. Das isch au de Bedarf gsi wo ich gha ha.

Manowela

ich han au en spitexverfüegig becho, de spital bi üs gahd recht offe demit um und verschriibt das, wemer mehreri chind hed eifach zur zuesätzliche unterstützig. (ha bim zweite scho eini becho, aber det hani no zuesätzlich Unfall mim Knü gha; bim dritte etz ohni Problem, eifach willi scho 2 dihei han)
du chasch wähle, für was das investiersch. theoretisch au für dbetreuig vom grosse. ich bi HP versicheret und ha wàhrend 16 wuche a höchstens 30 täg en Betrag bo je 80fr zguet. aso leistige im wert vo 2400fr. finds so super.
du mussch au nid dspitex näh; es darf eifach niemert sii, wo verwandt isch, das isch dregle. en privati putzfrau gäng zb au.
icb wür das unbedingt afrage, am eifachste grad im spital und susch allefalls bim FA. begründe chaschs mim Chliine (Grosse) wo dehei hesch oder allefalls mit Geburtsverletzige etc.