Nimmt mi wunder? 😅

Waschbär1993

Wie lang schlofed euri Babys

Üsi chli isch am 05.03.23 uf d‘welt cho und schloft amel so zwüsched 21.00/22.00 Uhr bis öppe am Morge am 4i/5i immer so zwüsched 5-8 stund. Wenn denn chunnt sie nur 1 mol pro nacht.

Letschti Windle chunnt sie öppe zwüsche 20.00/21.00 Uhr über plus minus und de letscht Shoppe au öppe denn.

Wie isch das bi eu?

Lilamama

Eusi chli het i dem alter ca vo 21-8 uhr gschlafe und isch 2-4 mal i de nacht gstillt worde (hend es familiebett)

Mamelo

Met 5 mönet gohts am 7ni es bett ond es werd aso bes 6/7ni gschlofe met 1-2 onderbröch.
Aktuell. Werd no mängisch ändere...

Groan

I dem Alter vo 21-6/7, 2 mal trinke.

AnDu88

I dem Alter het üses erste Chind vo 21/22-8/9 Uhr gschlofe und isch all 1,5-2h am trinke gsi meistens am duur-nuggele ade Brust. Sehr e intensivi zit gsi. Het uuu vill Körperkontakt brucht au ide Nacht.

Üses zweite Baby, s puure Gägeteil. Vo 19-6 Uhr gschlofe und het nur all 4h schnell für 10min trunke 🤷🏼‍♀️

So si d Chinder verschide. Aber d Schlof/-Trinkgwohnheite ändere sich ständig.

CDanielle

Aso euse chli isch etz denn 10 mönet und gaht normal 8.30 ist bett und schlaft bis am 7/8. Er isch aber au am duur-nuggele… sicher au all 1.5-2h… wechslet aber mega viel und mängisch vu nacht zu nacht anderst.. er het aber nonie meh wie 5h am stuck gschlafe 😬 @AnDu88 wie lang isch da bi eu so gsi ab wenn isch besser worde?

AnDu88

@CDanielle Bi eus isch das ab Geburt bis ca. 5/6 mönet so gange… mol besser mol schlechter. Ab 6 Mönet hets langsam afo bessere und d Abständ si immer e bitz grösser worde.
Duregschlofe (d.h. 6h am Stück) het er aber ersch mit 2,5 jährig woni ide Nacht abgstillt ha 😅 aso weiss nid ob der das jetzt hilft 🙈😂

CDanielle

@AnDu88 Hmmmm ja ned würk 🤣 aber ha scho vu paarne ghört dass besser wird wemmmer de nümme stillt ide nacht.. i bi aber no wiit eweg vum abstille aso i glaub de chli au 🙄 jänu i mue sege inzwische hani mi dra gwöhnt i frag mi efach wies de isch wenn mir no e 2. Hend 😂

AnDu88

@CDanielle Ja me gwöhnt sich würklech dra…irgendwenn isches eifach normal 😅 solangs für di stimmt, isches guet ❤️

Ig ha mi gross denne erscht komplett abgstillt woni bi schwanger worde mitem zweite. Hätti zwar gern witer gstillt aber es het eifach nur no mega weh gmacht und Milch isch denne plötzlich au fasch keini me cho. Wäge dem hanis denne durezoge mitem abstille.

Pallas

Also das wegem Stille i de Nacht das weniger/ schlächter schlafet het mir de Arzt erklärt stimmt so nöd. Baby werdet nöd wach wegem Hunger. Das het meh mit de Hirnriefig ztue ob es Baby cha durreschlafe oder nöd. Git au voel Fläschebabys wo nöd durreschlafet. De Largo erklährt ja das au ganz guet i sim Buech.

Mini het mit Stille und nacher mit Fläsche nöd durre gschlafe, churz vorem erste Geburri het sis chöne.

LillyFee

Üse Chlii het vo 3.5-6 monat vo 19:00-7:00 düregschlafe ohni stille.
jetzt uf z mal ischer meistens vom 4:00-6:00 wach🥴 kei ahnig wieso 🤷🏼‍♀️

Yuna

Bi üs ischs au so dass mini chli mit 10 mönet no i de nacht viel nuckelet. Es git nächt wo si all 30-60min wott nuckele und s git nächt do chunnt si nur 2 mol. Si schloft bi üs im zimmer im gitterbett und wenns e strengi nacht isch lohni si grad bi mer im bett.

Wie gsehnd ihrs mitem abgwöhne vom stille zum ihschlofe und i de nacht? I wirde vo vielne site druf ahgsproche dasi si z fest verwöhne und dass si so nie wird lerne ellei schlofe. I wött si aber nöd in schlof brüele loh das findi s schlimmste..

ally

Oh mir gahts gnau gliich. Nur schlaft eusi (11 monat) direkt im bett, will s ablege ish mega schwirig vo ihre. @Yuna

Yuna

Jo das isch ebe au sone sach.. i mues momentan bim mittags und nomittagsschlof bi ihre ligge blibe.. i wott eifach nöd dass si übermüedet isch und weni si nochem in schlof stille versuech is bettli lege verwachet si jedes mol und so wirds zumene kampf vo 2h oder so bis si entli ellei schloft will si eifach fängs so fest müed isch und i stell mir da eifach nöd schön vor.. drum blibi hald bi ihre dass si i rueh e stund schlofe cha oder e mega kampf z ha.. entweder schlofi denn au grad oder susch tueni hald am handy umetöggele oder so

Tanja87

@Yuna es isch doch dis Chind und dini Entscheidig was, wenn und wie du dim Baby tuesch büte. Los uf dich und dis Herz, ned uf Ussage und "Ratschläg" vo andere. Es Chind i dem Alter chasch ned verwöhne... Es brucht eifach sis Mami und dis Baby vlt. eifach meh Nöchi🥰 ich han die Ziit so unglaublich gnosse, au wenns mengisch streng isch und du churz vorem verzwiefle bisch, da du no dies und jenes settsch/ chönntisch erledige wehrend dem din chli Schatz am pfuuse isch😅
Mier heds enorm ghulfe, dasi mer immer gseid han, tas isch en Phase, es chund denn scho... und eso isches au gsii☺️

Tanja87

Sorry für Grammatik und Rechtschriibig🤣🤣🤣🫣🤭

Yuna

Danke für euri liebe wort. I fühle mi ez nüm so unfähig und bi froh dasi do nöd nume uf ablehnig stosse. Es tuet guet z ghöre dasi nöd alles falsch mache😅

Mayla

@Yuna ich denke das mitem schlof i de nacht zieht sich bis öpe 1,5 jöhrig. Klar jedes kind isch anderst.. ich wür bi so sache noch de theorie goh, am afang viel energie dristecke, am baby sicherheit geh bises so selbstsicher isch und e super bindig zu dir het, den gischem viel guets mit uf de lebesweg ❤️. Für de schlof de tag dur chöntisches au mitem tragetuech versueche went chli öpis möchtisch mache, da funktioniert bi üs am beste.

Yuna

Jo i denke i gibe dem ganze eifach nochli zit es sind jo vieles eifach fase und entwicklige wo si dure macht.
Aso hoffi eifach immer😅
Und s tragtuech bini en grosse fan das chunnt oft zum ihsatzt, aber ez immer wie weniger will si hald au langsam schwer wird.

Groan

Eusi isch etz 13 Mönet alt und het ab 9 Mönet plötzlich uf all 1.5-2.5h ide Nacht gwechslet. Han denn glese, dass sie grad so zwüsche 6-12 Mönet namal öfters trinked. Ich hami darum denne bi 10 Mönet defür entschiede bis nach jährig mal na abzwarte. Und siehe da, zwei Wuche nach Jährig chunt sie etz am Afang nach 3h aber macht denne oft en 5-6 Stund Abstand. Das isch für mich schone mega Erliechterig! Und es isch bi eus etz eifach so cho.