Geburtsgebrechen

aenn

Hey ihr liebe

Ich ha denkt ich starte en usstusch da im forum..

euse chli bueb het en herzfehler wo erst nach de geburt entdeckt worde isch. Mittlerwil isch d‘op dure und sowit alles guet gange. Hallelujah 🙌🏻🥹 mir sind so dankbar!

Trozdem beschäftigt mich das thema meeega starch. Vorallem welli vill anderi mamis und papis kenneglernt ha wo ähnlichs münd duremache. Füre psychologin hani mi au ahgmulde aber trozdem denki dases helfe cha sich mit anderne usztusche wo au so öppis erlebt hend..

Es söll lediglich zum usstusch diene und hoffentlich bide verarbeitig helfe.♥️

Hebed eu sorg🙏🏼🩵Hoffentlich gits nöd z vill wo dere disskusion biträttet🥺🩵

Thea

Hallo @aenn !

Eusi ersti Tochter isch vor 4.5 Jahr 5 Wuche zfrüeh ufd Welt cho und d Lunge isch nach eme Tag (wo d Wert scho immer schlächter worde sind, trotz diverser Surstoffgab-Methode) kollabiert und sie hät müese intubiert werde. Mir sind über e Wuche uf de Neointensiv gsi und mich hät das enorm prägt. Mir händ nöd gwüsst, öb sies überläbt. Hüt gahts ihre zum Glück guet. Sie isch immerno ahfälliger als anderi Chind für Atemwegsinfekt (a ihrem erste Geburi simmer au mit Surstoffpflicht im Spital gsi). Aber sie häts überstande.

Ich wache hüt no mängisch uf, will ich vo dene piepsende Neo-Maschine träum, wos ahgschlosse sind. Ich weiss hüt no, wies deht gschmöckt hät. Und gnau wie Du händ au mir Familie könneglernt, wo no vill schwereri Geburtsgebräche gha händ und wo scho 3-4 Wuche oder no länger deht gsi sind. I eusere Ahweseheit isch denn au es Früeli us de SSW 24 uf de Station gstorbe. D Eltere händs denn ime chline Sarg abgholt (das hani nöd gseh). Die Angst ums eigene Chind isch unbeschrieblich. Gnau so wie d Liebi.

Eusi Chlii isch uf jedefall e Kämpferin. Sie hät schlächti Prognose gha und hät nach enere Wuche chöne extubiert wärde. Bin bis hüt so unfassbar dankbar, dass mir sie döfed ufwachse gseh. E ganz normali 4 Jährigi wo grad in 1. Chindsgi cho isch 🩷

minggi

Hallo zäme

Min sohn het nur es "chlieses" geburtgebreche gha. Er het en Infekt ufglese bide geburt und het den dementsprechend Antibiotika brucht. Mier het meh min sohn n
12h nach de geburt eifach weg gnu und usserkantonal ufd neointensiv verleit. Ich bin zrugg blibe und han nid gwüsst wo ane mit mine gfühl. Keine het chönne säge was und wie schlimm es isch. Am nächste morge bini ins gliche spital wie er verleit worde und ihm den nüme vo de siite gwiche. Mier sind nur en wuche uf de neo gsi und es het mich und min sohn sehr prägt. Er isch jetz 2.5 und sehr liebevoll und sensibel. Au chli ahfällig uf krankheite. Huet ab vor all dene Mamis wo die schwäre ziite mit dene schwäre gebräche meisteret. Als Mami leistet me i sonere situation enorms....

Pheobee

Bi üsem Sohn isch Leukämie diagnostiziert worde woner gad mol 13 Wuche alt gsii isch (do e Leukämie ca 3-4 Monet brucht zum entstoh isch er no im Buuch

Pheobee

chrank worde, drum Geburtsgebreche). Mir sind 167 Täg im Spitol gsii mit allem drum und dra… Intensivstation, Chemo, Intubation, schweri Nebewikige vo de Chemo , Tod vo anderne Chind uf de Station ect. Das alles isch hüt 4.5 Johr her und üsem Bueb gots super. Er het kei Spotfolge. Es isch es Wunder und mir sind jede Tag dankbar. Trotzdem gits immer wieder Situatione wo Erinnerige ah dazumal ufwecket und da tuet denn sehr weh.

•Elefäntli•

Do wirds eim Kalt dä rugge ab weme so was lisst vo eu.

Min Bueb isch mitere Linkssittigä Lähmig uf d Wält cho und das Weler bi mir im Buch en Schlagafall ka hed.
I ha hüt no müeh und muess oft Brüele aber weni sosache wie Leukemie lies denn bini wieder um so meh dankbarer dörf min Bueb do si. 🙏🏻🙏🏻🙏🏻🙏🏻🙏🏻🙏🏻Ich wünsch allne unheimlech viel Kraft, es isch nö immer liecht mitmene schiksalschlag aber mir mached s best 🤗🤗🤗Fals do inä ä Mami gid vo e Kind hed mitere Hemiparese i bi offe für en ustusch oder au mol ä Treffe 🤗

aenn

So krass was für gebräche und erfahrige zämechömed. Es tuet mer so leid daser sone zit hend müse erlebe.. 😥♥️ aber schön das au bi eu alles meh oder weniger guet worde isch🙏🏼♥️

Ja mir hend im spital au einiges mitbecho/erlebt aber zum glück nie wie es chindli gstorbe isch. Wüsst nöd wieni das verchrafte wür..🥺