Ab wann das erste mal Auswärts schlafen?!

Hallo Zäme

Üsi chli isch jetzt denn 2 Mönet alt, devo sind mir afangs knapp 4 Wuche im Spital gsi (Stationär & Intensiv).
Jetzt het mini Schwigermuetter die chlii scho vor 2 Wuche welle über nacht ha, ich ha de gseit das isch mir no z früeh.
Jetzt isch Sie aber schowider cho sie möcht sie de i 2 Wuche, de ha ich gseit ich möcht das nonid, de het sie gmeint ich heig ja jetzt no e Wuche ziit und sell mich mit dem gedanke afründe, söll mich mit dem gedanke afründe und müess mich auch chönne löse.
Aber ich wet das eigentlich noni, nur scho will sie so lang im Spital gsi isch, und ich wet das mir üs jetzt dehei au zerst richtig iläbet.
Hend ihr euchi scho so früeh weg gäh zum übernachte? Mir isch es ehrlichgseit eifach würkli no z früeh.😕

Kommentare

  • Mi gross isch gloubs mit 6 oder 7 mönet z erste mau übernachtet. Da würd ig ar schwigermuetter klip u klar säge, das du säuber duesch entscheide wen das dis schätzeli z erste mau söu uswärz übernachte. La di nid la stresse, du muesch es e so mache, wies für di stimmt. Egau was anderi wette. Du bisch z mami, und entscheidisch. Es wird speter wens euter isch no gnueg uswärts pfuse 😉. Du machsch des scho guet, muesch ja ou zerst eue autag finde 😘😘
  • Danke für dini Antwort 😊 ja genau, ich ha ihre au gseit bruche no chli ziit mit dem ganze was gsi isch und langi ja au no i 2,3 Mönet de.....Sie het de nur gmeint....das gaht ja gar nid, müess sie jetzt scho da dra gwöhne suscht gieng sie NIE uswärts. Ok das würdi ja evtl säge wenn sie die erste 1,2 Jahr nie wäg gaht aber nur will sie jetzt noni grad gaht wird das keis problem si.
  • Lol wenn de würsch stille chöntisch sie ja gar ned uswärts gä🤦‍♂️ schad macht der dini schwimu so en druck. Icv han min chöine met 2 mönet serste mal abgä und es esch schrecklich gsi für mich😂😂😂 hane den erst met 4 mönet weder abgä. Jetzt gahts ganz guet. Solang de chli die gliche rahmebedingige bem schlafe het, machts eigentlich kei problem.

    Ich glaube es esch vorallem, wenns die personenned guet kennt. Oder wenns diheime em gliche bett schlafid und de usserorts elleige schlafe müend
  • 😂😂mini Tochter jetzt s erschtmal mit 3.5 JÄHRIG
  • Ach nei, wenn sie‘s dir will ufzwinge, macht sie sich kein Gfalle. Lass dich ned verunsichere, ich find dis Empfinde völlig normal. Min Chline isch „erscht“ mit 9 Mönet s‘erschte Mol uswärts gange, aber miteme guete Gfühl. Das isch sicher au wichtig, demit sChind das merkt.
    Mer händ aber vorher paar Mol SchwiMu gha zum bi eus 2 Std luege, demit mer händ chönne go uswörts ässe. Das isch super gsi. Vilicht wär das e Zwüschelösig, wo dir au mol Luft gitt - aber uf kein Fall, will sie dir öpis ufzwingt.
  • @Romiina😂;😂👌 jo gäl wenns kein Grund git. Ich glaub min Sohn wird au lang nöd uswärts schlofe, warum au 😊
  • PS. Bi Schwiedermüettere hilft rede leider amigs nöd viel, do sött din Partner mol äs Wörtli mitere rede 😉
  • Danke euch allne, ja ich ha de au gseit es gits no gnueg früeh dasi e grund ha und öpper bruche wo uf sie luegt....
    @Saco87 7: jaaa genau! Er isch nebedra ghocket und het nid würkli öppis gseit obwohli ihm scho bim 1 x gseit ha er dörfti ihre gärn s nächstmal dütlicher mache dases no z früeh isch und mir de scho uf sie zue chömed....
    Das hemmer leider scho öfters gha, dasi säg ER söll ihre doch amig au klar so sache säge....funktioniert nämlich nid würklich.

  • @sonnenblume Männer 😂 viel chönd bim Mami leider keis Machtwort usspreche, das muesch du übernä und bisch denn ebä dä Bumann, die kompliziert Muetter usw 🙄 aber lieber das als dass die Chli weggisch und es eigentli völlig geg din Wunsch goht 😊
  • @Saco87 : duet guet z ghöre, hend nämlich scho ab und zue disskussione gha weg dem, ich säg ihm jedesmal er chönnt ruehig au mal es wörtli mitrede bi sinere Muetter suscht klappt das überall wunderbar, aber bi ihre überhaupt nid!
    Ja du hesch rächt, ha jetzt scho gmerkt sie findt ich däg extrem kompliziert....obwohls mir suscht würkli super hend...aber`s leider glich immer wider so Situatione git
  • @sonnenblume jo leider kein Einzelfall 🤷‍♀️ chaschs ihm glaub no so oft sägä, ändere duet sich worschindli nüt...am Schluss heissts no du heigsch ihn bearbeitet und es seig gar nöd sin Wunsch sondern dinä fals er glich öbis würd sägä 😂 chaschs mache wies wotsch, du muesch do durä 🙄 nöd chli kriege lo...isch dis Baby nöd dä Schwiegermuetter ihräs 😊
  • Danke!
    Ha nämli hüt Morge schowider e Nachricht druf gha, und däänkt...neeei nid schowider oder.
    Hend abgmacht das sie jetzt ebe mal am SA vormittag dörf luege das sig ok...jetzt het sie schowider gschribe bring sie doch am FR abig de münder nid so früeh ufstah 😅😅🙈 machts no schlimmer ihre 100x müesse nei säge ;-)
  • Oh isch ä recht hartnäckigi 🤭 äs Nei nützt so wies usgseht nüt. Ich würd glaub eifach gar nöd uf das antworte und wenn sie denn nomol 3x frogt seisch: ha jo gseit Übernachte nöd und drum wirdi uf die sms au gar nümm i go. Verstoh e nöd warum sie dEnkelkind immer über Nacht wänd ha 🤷‍♀️ cha jo froh sie gisch sie ihre Tagsüber...ich het glaub enorm Müeh öberem mis Chind überhaupt zgä wo mini Meinig so wenig akzeptiert.
  • Ja, genau das hani zu mim Mah de au gseit wenn sie das nid akzeptiert und so duet als wärs ihres chind willi sie us "trotz" erscht rächt nid gäh...ha de dänkt bi sicher die einzig wo so dänkt ;-)
  • Nei nei das bisch nöd...ha au mol so ä "Schwiegermuetter gha" mein Gott isch die mir uf dä Keks echt. Bis ich denn mol uf dä Tisch ha ghaue und ab dött uf ihri Üsserige gar nümm druf i bi, ha sie ignoriert 😂 so het sies denn verstande. Du bisch zMami, du entscheidisch. Mach nie öbis wo du nöd wotsch, glaubs mir du würdsch di nur extrem unwohl füehle, keis Aug zue due und dis Chlinä gspürt das denn au. Ha glernt, wenn me öbis macht wo mä eigentli nöd möcht nur um anderi zfriede zstelle, isch keinem gholfe. Du machsch das scho richtig und wänn din wehrte Herr Gemahl sich nöd cha dure setzte, mueschs ebä du 😉🤣
  • Ich würd ab jetzt eifach nur ignoriere, wenn sie wieder wägem übernachte frogt. Dini muus isch no so chli. Das muess sie verstoh, basta. Cha die frau bim beschte wille nid verstoh, dass sie so insistiert obwohls du gseit hesch. Und dim maa muesch würlich sage, dass är di muess unterstütze, no besser s rueder übernäh in däm fall.
  • Du machsch das scho guet👍🏻 hesch vollkome recht wenn sie nöd wetsch abgeh musches au nöd und finds echt rücksichtslos vode schwimu sich so ufzdränge aber ja glaub viel hend so schwiegermamis wo irgendwie am rad dreied wenn mir das nöd so mached wie sies bi ihrne chind gmacht hend und hend denn s gfühl sie werded verwöhnt oder chönd denn dis und das nöd🤪🤪
    Mini isch damals us portugal agreist cho und het mer am erste abig de chopf voll gschnurrt wasi alles falsch machi und sie nämi sie jetzt und het sie mer paarmal us de ärm gno(sie 4wuche alt)naja nach dem abig het die frau vo mir ussert hallo und tschüss nütme zerwarte🤪🤪Machs eifach so wies du denksch din instinkt und dini chli wird eui denn scho zeige wenn sie denn parat isch zum uswärts schlafe.viel durchaltevermöge und nerve wünsch ich dir🍀🍀🍀
  • aaa gott wen ich das nur scho wieder lise mit sie muess sich dra gwöhne🤢🤢🤢🤢🤢🤢🤢 SIE muess gar nüt & DU muesch au gar nüt. Min chline 9mnt isch no nie usswärts am schlafe xsi.. Ich chenti ihn nie im lebe bide schwigi schlafe lah ich glaub mis herz wür blüete.. und ja wie die einte xseit hend din partner muess da wahrschidnli dehinder.. min maa hetti au kei müeh wen er ned dehei schlafe wür, aber ich
  • was isch den da Grund wieso sie die kli jetzt scho übernacht ha wet? stillsch den du? also ganz ehrlich min kli isch jetzt 8 mönet und mir hend nu zäme uswerts pfuset. zit zum das üebe hender no gnueg. luegen si den spötr mol uf di kli? i han es uh glück das mini SchwiMu nöd so isch. und mis Mami sait immer lug isch dis Kond dini entscheidig du kennsches am beste. drum sägi dir los uf dis Buchgfühl nu wel sis will chan dir das egal si es muss für oi stimme wel du machsch wedr die no dinre kli en gfalle weners jetzt durestieren. klappts den nämli nöd in da nacht den wirsches au ghöre. waser mache chönd isch mol zäme döt schlofe. min kli het au scho bi mim mami gschlofe abr i han den au döt gschlofe wel a. i no still und b. er uswerts meh verwacht obwohl er genau di glich zewidecki het nuscheli und stofftierli und nuggi. au merkters wen nöd ich en is bett tue. sind sehr vieli faktore und wen si das nöd verstoht den het si aifach en zu grosse tunnelblick.
  • Haha mis chind würt NIE dött übernachte und das isch ganz älai mini entscheidig, äs würed nur sache gmacht wo min maa und ich iverstande sind, also alles guet😊
  • Aber emmer ufpasse met de tonwahl. Wel ergendwnen esch mer au mal froh wenn eber die chline über nacht nimmt ubd me sich erholfe chan oder es weekend weg fahre. Vieli hend die möglichkeit gar ned.würd ere uf en netti art und wiis ergebdwie klar mache, eifach jetzt nanig
  • 🤦‍♀️ich has mir damals vo minre schwimu und mim partner ufschnorre loh und mini twin babies s erstmal mit 4mönet abgeh (ha beidi voll gstillt bis vor kurzem 21mt) und mir ischs so schlecht gange die 1nacht...dasi denoh mich und mini babies ahhgfange ha soo abschotte vo allne andere...bi nurno mit ihne allei gsi...🤪demit will ich sege...mach dir kei druck...egal was anderi wend...es muess dir und de kinder guet goh! Wel wenns dir nöd guet goht demit, denb ischs au für s chind nöd guet! Ich bereu etz sehr dasi mir 1.5jahr lang mir ha druck, schlechts gwüsse etc. Mache loh! Da het mi nu fertig gmacht und überhaupt nöd guet tue - etz woni würkli allei bi mit de kinder (ha mi trennt) und allne gseit ha es lauft nurno das wo mir guet tuet mit de kinder 😊gohts mir suuuper
  • Min Bueb wört nöchst wuche zwei und isch nonie eleige uswärts go pfuse, aber mir wönds bald mol probiere.
  • Han jetzt nöd alli komentär gläse: es muess für dich und dis baby stimme und suscht für niemert anders au nöd für dini schwiegi und wieso beharrt sie dänn so druf🤦‍♀️ mine hät mitca 6mönet s erste mal bi mine eltere pfuset und ich hät ihn vorher nöd abgeh gha. Und was sell de scheiss mitem ablöse und dra gwöhne,das gaht au nachher no problemlos🤦‍♀️ lah di nöd lah unter druck setzt und mach das was für dich stimmt
  • Danke euch allne!!!😊
    @Füxli , git nid würklich en grund...eifach so...
    Nei ich chan ebe leider nid stille 😔
    Und nei das sie spöter uf sie würdet luege isch au nid de Fall 🙈 Ja sie verstaht all das leider nid und findt mi cha s chind au z fescht verwöhne, obwohl ich finde das het überhaupt nüt mit verwöhne z due nur will ich sie nonid grad will gäh mit knapp 2 mönet.... isch geschter wäg dem ganze wider völlig verruckt gsi und het gmeint unglaublich wie ich mich astelli, all andere würed nid so es Theater mache weg so was, ich übertribi völlig 🙈🙈🙈🙈
  • Mi e ab Jährig
  • Aso min Sohn isch jetzt 2,5 und het no nie usswärts gschlafe... 🙈 Wo Tochter ufd Welt cho isch het en miis Mami ghüetet aber bi euis diehi. Da ischer 2 gsi. Quasi die erst Nacht ohni Mami und Papi. Isch überhaupt keis Problem gsi. Das mumer ned üebe. Wenn sich Chind wohl fühlt isches keis Problem.
    Ich han bis hüt no nie bedürfniss gha mini Chind über Nacht abgeh. 🤷‍♀️ Guet mini Chli isch au immerno voll gstillt und nimmt kein Schoppe.
    Lass dich ned überede. Gib die Chli erst wens für dich stimmt. Egal ob das mit 3 Mönet 1 Jahr oder 3 Jährig isch.
  • Höö, das het sie doch nid zentscheide.. sorry, aber die isch chli doof, he..
    Eusi het s erste Mal mit 1J6Mt usswerts gschlafe. I stille jetzt immer no ide Nacht und han sie au nid welle früehner weg geh 😊
  • Äh mini Chlii isch 32 Mönet u het bis jetzt nonie ohni üs bi andere gschlafe.
    De Quatsch immer: süsch lerne sis nie... oder das chasch ner nüme abgwöhme... bla bla...
    Ha nonie e Maa im Militär ghört grenne, will er us Kind nid glernt het uswerts schlafe 😂🙈🤪Nei, losuf diis Gfühl u gibs erst ab wenns für dich stimmt... egal au wenns erst mit 2 oder 3 isch.
    Mach ihre klar, je me si fragt je spöter wirds. Bsp bi jedem mal frage gats e Monet länger. Also würdisch si glau i diim fall eh erst nöchst Jahr abgeh 🤪
  • Wieso mues es Kind überhaupt allel Uswärts schlofä? Ich gseh bi mim Sohn kein Grund...spöter mol wenn er zumnä Gspähnli wot aber vorher ha ich lieber än Babysitter und er dörf Dihai schlofe. Also jedem das seine aber äs Müese ischs uf jede Fall nöd vorallem nöd bi somene Schwiegermonster (sorry) aber so het ich es mega schlechts Gfüehl, da sie dini Meinig nöd respektiert, wird sie au nöd respektiere wenn du ihre zuekünftig seisch was dis Chind z. B nöd dörf mache,esse usw sie wirds ignoriere.
  • Üsi mit 18 Wuchä ☺
  • Üsi beidi je mit ca.6mt u sit beide jährig si 1x pro wuche bi mim mami weni ga ga schaffe! Finge es mues für di u ds baby stimme! Mir gniesse dä frei abe ihr wuche u mini beide gniesse den ds grosi! U villich het si ds gfühl si möcht di ungerstütze das mau ä pouse hesch, isch sicher ou ahstrengend gsi diä zyt im spital! Si chas villich eifach nid anders übere bringe🤷‍♀️ wes dis mami wär, wärs anders für di? Mängisch gseht mes bim schwiegie viu enger aus bim mami😅 aber nume mache damit d chile im dorf blibt würdis nid mache..
  • @sabi81
    Ja genau, das weissi scho au und sie het au gseit sie weiss was mer alles heiget müesse duremache und well drum au hälfe, au will mer nid viel schlaf gha heiget det wo sie uf de Intensiv gsi isch....und ich schätz das natürlich au sehr! Aber ha ihre au gseit sig uu lieb gmeint aber sig mer eifach chli z früeh jetzt womer sie ändlich dehei hend, und denn het sie halt scho grad jedesmal gseit sell mich nid so astelle und müess mich löse suscht gieng die chli nie nachher....und da bini halt scho anderer meinig.
    Ja bi mim mami sägi das ganz klar und diräkt, aber sie het das au grad akzeptiert und verstande das ich sie nonid wet wäg gäh.
    Danke für dini Antwort :-)
  • Lahn dir jaa nöd la dri rede. Machs wies für DICH stimmt! Egal was dini schwimu seit. 🙄🤦‍♀️
    Ich han mini Tochter s'erste mal mit 1.5jährig zum übernachte mine eltere ge, will ich vorher nöd bereit dezue gsi bin. Und ich bereus kein einzige tag. Sie isch jetzt 3jährig gsi & gaht seehr gern zu mine eltere go schlafe. S'letste mal hät sie sogar vo sich us aglüte wo sie eigentli hei cho wär, ob sie no e zweiti nacht dörf blibe. Also da gsesch, es isch überhaupt nöd z'spaat & au überhaupt keis problem. Lahn dir so lang ziit wie du möchtisch. 😘
  • Mini isch nach 4 Mönet s erst Mal bi mine Eltere gsi - aber freiwillig und vo eus us! Nöd will mis Mami gstürmt hätti oder so. Sie hät mir nzr gseit gha: „Wenn Du e Nacht frei bruchsch und möchtsch dureschlafe...“. Und das hämmer denn au gmacht und sehr gnosse.

    Mini Chli isch btw 5 Wuche z früeh cho und 2.5 Wuche im Spital gsi (ich möcht dademit nöd vergliche!).
  • Auso das mitem löse süsch cha sis später nid, isch sicher ih dem auter kes thema☺️ zumal si ja scho 1mt uf dr intensiv isch gsi ällei... ig würd demfall immer u immer ume säge mir chöme de gärn uf ihres ahgebot zrugg wen dir so wit sit! Oder wie dus itz machsch, mau ä samsti vormi la luege... si wirds de wahrschinlich scho mau begriffe😅🙊
  • Das mit em dra gwöne chasch ehh vergesse. Üseri het zwüsche 4 Mönet und eim Johr es paar mol bi mine Eltere gschlofe. (will mir das hen welle). Jetzt isch si knapp 2Jährig und es klappet nüme mit em dete schlofe, obwohl si mini Eltere liebt und fascht täglich gseht. Wet demit nur säge, dass es kein Grund git zum jetzt dra gwöhne und wenns denn in Zoakunft mol wetsch unds denn nid gad klappet, lohn der nid irede, dass es hald verpasst hesch.
  • Mini gross mit 7 wuche, und dä chli mit 9 mönet s'erst mol bim omi.
  • In erster linie entscheidisch du als mami wenn di kind wo ane goht und niemert andersch los di do au gar nit verunsichere oder dränge.
    Vorallem isch si jo no gar noni solang dehei zerst müend dir als familie zäme wachse und wenn me e baby uf de intensiv oder neonatologie ka het git me se no viel weniger gern wäg so isches mir uf jedefall gange euse kleinst isch mit 5 monat 1. Mol bi de oma go schlofe jetzt ischer 10 monat alt und goht au jetzt nur zu de einte oma neume andersch würden au noni ane geh welle.
    Mach das was du für richtig haltisch und red vilicht au mol klartext mit dinere schwimu wenn de das noni willsch das die klei zu ihre goht muess si das akzeptiere.
Hey! 1 Frage - 100 Antworten!
Im BabyForum kannst du dich einfach, sicher und anonym mit (werdenden) Mamas und Papas in deiner Nähe austauschen. Registriere dich jetzt, um alle Bereiche zu sehen und mitzuplaudern:Kostenlos registrieren

Social Media & Apps

Registrieren im Forum