Erfahrungen nach Geburt 2. Kind (3,5 Jahre Altersunterschied)

Hallo Zäme
Üses zweite Chind chunnt im Juli ufd Welt und i ha gmerkt, dass mi Sohn ide letschte Wuchene sich sehr veränderet het. Isch ja au verständlich, Mami wird ründer, er gspürt s Bebe wies bewegt, d Vorbereitige wome trifft etc. das aues geit natürlich au nid spurlos amene 3,5 Jährige verbii, das isch mir bewusst.
Er brucht wider extrem vill Ufmerksamkeit, isch sehr ahänglich, isch oft unusgliche/niedergschlage, wett nur bi mir si, wett fasch niene me häre (grosis etc), brucht wider vill hilf bi sache woner vorher guet allei het gmacht und het sit dene Wuchene sehr usprägti Wuetafäll und d’Nei-Phase isch sehr presänt. I gibe ihm die Ufmerksamkeit und die nöchi woner brucht, bi sehr geduldig und verständnisvoll nur isches aber au sehr asträngend momentan und i chume öfters a mini Gränze 😅. Mi Maa hilft mer vill und macht au vill mitem Chli. Nur macht mer das langsam chli Angst wenn de s Chline do isch.

Wie heit dir die ersti Zit nach de Geburt vom zweite erläbt? Wie heiter s grössere Chind ibezoge i das ganze? Was heiter für tipps und tricks? Wie isches gsi mit de iiversucht? I weiss es git kei allgemeini Lösig, aber mi interessierts wie bi euch d Umstellig isch gsi. Merci scho für üchi Erfahrige ☺️

Kommentare

  • Bi mir genau glich gseh ond immer no so blobe noch de gebort😞 mine sohn werd im juli 4i mini tochter esch im März of d welt cho...ech ha leider ou kei lösig...nimms immer vorewäg mol gids besseri täg mol weniger gueti...es esch jo ou verständlech das sie so reagiered wel sie nömme die ufmerksamkeit hei wie vorher....
  • euses 2te isch juni19 uf welt chu und de gross isch den au 3.5 gsi. Am afang het er die chli völlig ignoriert und nüd wellä wüsse. da hemer ihn eifach mache loh und nach 3 wuche ischer selber zu ihre. er isch eifach immer mit chu gu wickle, han ihm au mal ussueche loh was die chli söll allegä oder mir chlini sachene bringe. somit hät er sich als de gross gfühlt und isch eigentli immer guet gange. am afang hani au immer schön de zyt gha für ihn, aber da eusi muus ä obermamititi isch und ich kei bewegig mache dörf ohni das die chli iversüchtig isch, mömer jetzt au was ändere, mir händ denkt das es ei sunntig pro monät nur mami/sohn tag git und de papi mit de diva diheime blibt. zudem mach ich kei mittagspause meh sondern spiel den mitem junior, trotz/nei phase das hemer zurzyt au alles, aber das hät glaub eher mitem alter ztue. ja das isch so chli euses ding wo mit händ, aber irgendwie gaht ja glich immer alles
  • Ja das isch au min Plan, ihn in alles wo goht mit ibezieh. Er het vorgester au d Wickeltischuflag dörfe ussueche für sini schwöster. Het mer gholfe d Kommode uszrume...aso im bezug ufs Bebe direkt gspüri kei abneigig oder so. Er freut sich sogar, wie er seit. Mol luege wies de isch wenn die Chlini do isch. Aber i merkes wenni halt nid so mag spile mit ihm wie vorher, daser agressiver wird...au das mitem haue, chlemme und chratze gäge üs imene Wuetafall, het er vorher nie gmacht.

    Es isch sehr wahrschinlich scho au no s Alter wo e Rolle spielt momentan. Er macht grad e rächti Entwicklig düre. Trotzdem machts mer Angst au im bezug ufs stille... wenni dra dänke dass är amigs fürne Stillmahlzit 2h het brucht und e „nüggeler“ isch gsi 🙈 hoffe si isch de amigs schneller bim trinke 😅
  • oh ja das liebe stille, er isch au än langwiller gsi, madame isch zackiger gsi, i usnahmsituatione wenn er mega doof tah het, het er dörf ufem ipad toggolino spiele, suscht hemer eifach büechli aglueget oder ä eifachs spiel, schneckespiel oder krokodoc, so isches tip top gange, pendlet sich den schnell ih
  • Du machsch mer Muet 😄 ha aber jetz scho öfters gseh und ghört, dass d Meitli die effizientere trinker si bim stille. I hoffe bi üs isch das de au so, vorusgsetzt es klappet alles wie plant mitem stille.

    Ja das mit de Spieli isch e super Idee, er spielt mega gärn Gsellschaftsspieli oder au Puzzle 👍🏼

    Wie lang bisch du im Spital gsi bide zweite Geburt? Und wie hesch du s gschwüsterti am grössere Vorgstellt? Hesch si ufem Arm gha oder näbezue im Bettli?
  • bi am mittwuch morge am 04.00 is spital, die chli isch am 05.50 uf welt chu. am 13.00 isch de Papi mit em junior verbi chu. ich han eifach glueget das ich duschet gsi bin und die chli extra zerscht im wägeli ihne chli uf de siite, zerscht selber mal 15 min mitem junior verbracht. aschlüssend hani die chli ufs bett gleit und er het nur mal churz glueget, nacher heter isch spielegge vum spital welä. sie sind den bis am abed bliebe, am do/fr sind sie jewils nachem mittag chu, am fr hanis sogar bim parkplatz abgholt gha ( die chli isch den bir hebamme blibe), sind den ca 1h gu laufe und is kafi den het er nachem baby gfraget, simmer sie gu hole. am samstig nachem mittag simmer hei. öpä 2 wuche isches immer baby gsi erst den het er ihre name gseit. hät au guet mitgmacht woni nachem mittag chli gu schlafstille bin, ischer viel mitchu, sobald die chli pfused het, hani mit ihm kuschelet
  • Ohh das tönt sehr entspannt 🥰 ig hoffe sehr, dass d Bsuecherregelig bis im Juli wider chli glockeret wärde. So dass dr Chli üs au darf cho bsueche ❤️

    Bi scho sehr gspannt, wie er uf die Chlini wird reagiere. ☺️
  • Mi Gross isch bir Geburt vo de Tochter au 3.5 Jährig gsi (April 19). Mir hei vorgängig zäme immer widr s‘Büechli „unser Baby“ agluegt u ihn so druf vorbereitet. Er het am Tag vor Geburt (plante KS) sire Schwoscht es Gschänkli mitbracht u het vo ihre au es Gschänkli (Holztransporter) becho.

    Velech hani eifach es riese Glück; mi Gross liebt sini Schwö über aues u tuet wirkli sit Afang lieb mit ihre 🧒👶🏻💕
Hey! 1 Frage - 100 Antworten!
Im BabyForum kannst du dich einfach, sicher und anonym mit (werdenden) Mamas und Papas in deiner Nähe austauschen. Registriere dich jetzt, um alle Bereiche zu sehen und mitzuplaudern:Kostenlos registrieren

Social Media & Apps

Registrieren im Forum