Windeln wechseln - Baby 8 Monate

bearbeitet 28. 10. 2020, 14:15 in Allgemeine Themen
Hallo fraue, ha mal e chlini frog, min chline isch jetzt 8monet er öaht sich seeeeehr ungern windle wechsle er lauft defo, und brüelt sogar. Ich weiss nö wiso das er so tuet han im nie weh tah oder süst öpis, kennt das au öper vo eu und wie chani das besser mache oder wen wirds widdr besser mit dem.

Kommentare

  • Ohjoo das kenn i. Das macht mine scho sett er 6 Mönet esch, ( sett er sech cha dreie und chönne ufsitze) d esch er nie ruhig gläge und i ha mösse luege das i schnell gmacht ha , das er ned emmer medem dreckige Po hed chönne ufhocke oder weg schnogge 😂, momentan esches weder besser, ( mit bald 9 Mönet) aber er brüelled am afang bim änne legge emmerno vell.
    Am Afang hani werklech ame e Kampf gha und ghulfe hed meischtens nüd egal öb i ehm öppis ghä ha zom hebe oder ehn med singe etc. abglenkt han. D hed d Maa vell halt mösse helfe indem er ehn abglenkt hed oder halt chli ghebt hed.
    Er wett halt eifach ned legge, muess emmer en bewegig sii und bim windle wechsle gaht das ned.
  • Aso e rechtige Tipp hani leider ned. I denke das esch halt e Phase wenns ebe Mobil wärdet.
    Ruhig bliebe und emmer weder probiere ablenke.
  • Ja ich bliebe immer ruhig🙈🙈🙈 er lauft defo mit drekigem füdli, und weni in lah umelaufe den gits hald mal es bisi uf de bode🤣🤣 er findets lustig eifach wegzgah, uch lah öpe die mal musik laife de gahts chli besser aber ebe de tschegged das scho.

    Oh man sooo schad das er brüeled, ha den fast sgfühl dasi öpis falsch mache, aber de bini froh das ich nöd allei bin mit dem (problemli) joffe es gaht irgendeinisch besser🙈🙈🙈 danke
  • Jo ha zerscht au denkt i mach was falsch oder es dued ehm öppis weh bim potze aber es esch werklech nur s liegge a sech au wenn i ne umzieh dued er so. weil beni fertig mit wickle/allegge und er cha ufhöckled d strahlt er weder wie e sunneschiin und alles vorher esch vergesse. 😂
  • Ja bi üs isches o so. Er isch jetztde 11 mönet u mängisch isches immerno e kampf, vorallem we mr nöime unterwägs si🙈 dehei geids afe besser, mues eifach alles chli spielerisch gstalte de geids. Oder ihm öbis id hand gä wo ne interessiert. Im Moment isch d Zahnbürste si best fründ ufem wickeltisch😅 sobald er die ir hand hed ischer ruhig🙈
  • Oh ja, kenni au nur zu guet. Mine isch jetzt 9 monet. Ich wickle fasch nur nu im stah und nime immer Pants-Windle (de ischer konzentriert, schich an mier zhebe, das zwindlewechsle im nu durch isch 💪🏻). Und hüfig hilft grimmasse schnide & chitzle 😂. De ischer so am giggle & lache, daser total abglenkt isch.
  • Aah das keni so guät! Mie hei genau das Problem o gha! Pants hei gholfä, diä hani wenigstens wider chönnä alegä, normali Windlä si fasch nid mügläch gsi! Das isch öppä gangä bis 13 Mönät, när hets wider besseret.
  • Liebi Aleksandra, ich kännes vo mim Sohn nöd, aber usem Kitaalltag.

    Häsch sicher scho vieles usprobiert aber vilicht findsch i mine tipps glich no öpis wo probiere chasch:

    -singe wärend em wickle
    -spielsache mitneh (was no besser findet e creme oder so woner nöd grad cha sälber ufmache it hand drucke oder füechttüechli packig)
    -en andere Ort zum wickle sueche/ verschiedeni orte usprobiere
    -es mobile überem wickelplatz
    -am bode Wickle
    -gnueg früeh achünde dasmer gaht go wickle, vilicht paarmal vorher säge "mier gönnd go wickle"


    Aber wie du au us de restliche Kommentär uselisisch isch das total normal und du musch dir nöd en z grosse chopf drüber mache, s dut em sicher nüt weh und er hätt bestimmt kei angst devor... sehr warschindli isches me s "kei bock ha" wonen so frustriert...

    Hoffe s hilft der öpis us mine Vorschläg oder dases eifach verbii gaht
    Mer Drucked Duume 😊
  • Ich känne das au sehr guet 🤯 Für mich isches nie in Frag cho im stah zwickle oder ufem Bode. Ich ha vieles probiert und schlussändlich hetti dir die drü Tipps wo bi minere Tochter ghulfe händ.
    1. Wickle grad nachem ufstah. Das isch es Ritual worde und so het sie nonig gspielt und ich ha sie nöd müesse usem Spiel neh.
    2. öpis z‘Ässe geh bim wickle. Mini het Maispops schnabuliert 😉3. Es Küssi geh oder irgendwie de Kopf erhöhe. So gsehnd sie was du machsch.
Hey! 1 Frage - 100 Antworten!
Im BabyForum kannst du dich einfach, sicher und anonym mit (werdenden) Mamas und Papas in deiner Nähe austauschen. Registriere dich jetzt, um alle Bereiche zu sehen und mitzuplaudern:Kostenlos registrieren

Social Media & Apps

Registrieren im Forum