Geschwisterkind

Hallo zäme, mier erwartet üses 2. Wunder ufe Dezember. Altersabstand wärdeg 20mt sii. De gross fangt jetzt ah laufe. Ich möcht gern euchi erfahrige chli ghöre. Was isch die grösst veränderig gsi? Wie d schlafsituation? Wie hendrs transportiert? Gschwüstertewage? Uf was wäreder gern besser vorbereitet gsi? Was isch üch am afang eh grossi hilf gsi? Mich nimmt eifach alles wunder wo ier so erlebt oder wahrgno hend. Ich bin nu recht unsicher ob mier das alles schaffet. Danke für ücheri offeheit🙏

Kommentare

  • Liesse mit 🥰 interessante bitrag. Euse zweite chunt in 7 wuche und bi au echt nervös 🤭
  • Hey zäme 😊 ich ha vor 4 Mönet mis zweite Chind becho und de Altersunterschied isch 22 Mönet.
    De grössti Unterschied isch natürli chli d Ufteilig vode Zit gsi. Aber ich ha glueget das ich wenn die Chlini gschlofe hät ich voll für die Grossi do gsi bin und min Maa hät au sehr ghulfe das beid Chind ned zchurz cho sind. Ich beziehne die Grossi au i alles mit i. Froge sie eb sie mir will helfe bim wickle, is Bett bringe, säge ihre sie sell de Chline doch de Nuggi gäh usw. Da klappet sehr guet zun Glück und Iversucht isch bisher au gar keis Thema.
    Mir händ usserdem kein Gschwüstertewage, aber en Ufsatz wo die Grossi cha drufstah wenn sie nüme mag. Sie isch susch vell au mitm Trotti oder em Laufrad unterwegs. Aber ich denke da hängt devo ab welli Distanze du wotsch mache 😁Ihr schaffet da bestimmt! D Situation wird sich klar total ändere, aber do wachst mer dri. S blint eim gar nüt anders übrig 🤣 ich hoffe das hilft dir chli, susch chasch mi gern nomol aschriebe!
    Alles gueti für dini Schwangerschaft und gnüss d Zit no mitem Grosse alleige 🤗
  • De Altersunterschied zwüsched mine beide Meitli isch gnau 18 Mönet. Iversucht hämmer am Ahfang kei gha, ez sinds 3 und fast 2 und es chunt immer mal wieder. Bi schwanger mitem dritte (Altersunterschied fast 2 Jahr zu de Mittlere).
    Mir händ vo Ahfang ah en Doppelchinderwage gha, will ich vill in Wald gang go laufe und die Gross isch am Ahfang noni so guet z Fuess gsi. Chan mich mine Vorrednerinne bezüglich Ziit fürs einzelne Chind nur ahschlüsse: ha mit de Grosse vill gmacht (gmalet, Büechli gläse etc.) wo die Chlii Tagesschlöfli gmacht hät. Leider hät die Chlii oft Buchweh gha und ich han sie dementsprechend vill in Schlaf treit. Ha also „trotzdem“ zwei Chind gha 😂😬.
    Bi jetzt sehr gspannt, wies mit drü wird. Aber ahsträngend isch en chline Altersunterschied uf jede Fall, da dörf mer sich kei Illusione mache. Es isch aber absolut machbar. Und ich find, es lohnt sich: sie spieled jetzt scho total oft lieb mitenand 😍🥰
  • halloo😊
    Ha im März mis 2te Kind bekoh, altersabstand sind 19monet. Mir hend kai gschwüstertiwage, de klei hani im Tragi und de gross, wenni allai unterwägs bi im wage. wenn mr im wald sind oder neume wo kai autos fahre lauft de gross.
    Es lauft sehr guet mit zwei, immer wenni de klei still hocki äntwäder mim grosse an Bode, spiel öbbis mit ihm oder mir sitze uffs Sofa und luege zämme biechli ah. de klei shlooft am daag ebbe nur im tragi aber denn mole mr öbbis zämme oder spiele öbbis. Bi uns hets am ahfang bitz ihversucht gäh aber es muess halt jede „sin neue platz“ finde in de familie, ha am ahfang sehr zkämpfe kha mit de hormonumstellig no dezue aber es goht verbi, bliebt stressig aber uf jede fall vorallem au wunderschön. Muesh aifach jedem die ziht gäh wo er/sie brucht😊
  • Ich ha au grad echli Panik, i 4 Wuche chunt Nr. 2, Abstand isch allerdings 3.5 Jahr. Euse Grossi isch aber voll im Teubelialter und alles isch nei…ha würkli Angst vor Überforderig
  • mini girls hän au 20mt abstand,
    mir hän e gschwüstertiwage (mountainbuggy duet) - dä isch genial! si sitze (am afang sitze/wanne) näbenand und er isch nid breiter wie e 1er wage…
    mir hän kei auto und dh bin ich jede dag sehr viel mit wage unterwägs…
    iversucht hän mr am afang nie gha…
    ha s baby allerdings eifach immer und überall gstillt, also au am bode bim duplo baue, im tuech uffem spielplatz bim agäh uff dr riite/rutsche und und und
    si hets oft gar nid gmerkt…
    und wickle hani immer in dr stube ufem sofa, denn bini nie „wäg“ gseh und s isch eifach näbebi gloffe…
    alltag isch eifach ganz normal witergange und s baby isch drbi gseh… het immer eifach im tuech / tragi gschlofe…
    und erscht wo si nur no mittagsschlof gmacht het hani fescht versuecht, dass si glichzytig schlofe…
    allerdings hani zwei familiebett chind, dh hanj eifach gstillt& kuschlet im bett und beidi schlofe ca glichzytig ii…
    ha au knapp 1.5y tandem gstillt…

    jez afang april isch no s 3. cho… (22mt / 42mt abstand)
    bi wieder am tandem stille (mittel & baby) aber dr wage isch immer no für die grosse zum sitze und baby immer im tuech…
    isch eifach praktischer zum de grosse dusse hinterhär cho und 2 händ frei ha…
    still au sehr viel im tuech…
    und zum schlofe isch halt jez eine mehr im familiebett… 😉
    Mamelo
  • Wow mamis Respekt a EU 😍👌 ihr machet das so guet!
Hey! 1 Frage - 100 Antworten!
Im BabyForum kannst du dich einfach, sicher und anonym mit (werdenden) Mamas und Papas in deiner Nähe austauschen. Registriere dich jetzt, um alle Bereiche zu sehen und mitzuplaudern:Kostenlos registrieren

Social Media & Apps

Registrieren im Forum