Startseite› Allgemeine Themen› Plauderecke

Mammographie

CrystalCrystal

280
bearbeitet 14. 01. 2022, 22:20 in Plauderecke
I muess am mänti ga😏 wär isch o scho gsi u cha mir sägä wi schmärzhaft dases isch? U wi schnäu heit dir när d ergäbnis/besprächig gha?

Kommentare

  • GröipschiGröipschi

    148
    i cha vo beidne site brichte, i säuber due mammographie afertige u ha o scho säuber eini müesse mache.

    mir hets überhoupt nid weh do, obwou i süsch sehr wehlidig bi.

    u di meischte froue säge, es sig gar nid so schlimm, wi si gmeint hei. klar es git agnähmers.
    chunt natürlech o geng uf d frou druf a u o chli wärs macht.

    bi üs im spitau berchunt mä sofort bscheid vo de radiolog*inne, aber das isch nid standard (du tönsch nach bärn, vilech chunsch jo zu üs 🙃). drum weisi nid, wis angerne orte isch.
  • SonnenblümchenSonnenblümchen

    169

    Symbol
    Ich han eini gha und hans überhaupt nöd schmerzhaft gfunde. Klar es git au agnehmers aber isch würklich nöd schlimm gsi. Ich han au grad Bscheid becho, min Arzt hät dänn eifach na en usfüehrlichere Bricht becho.
  • CrystalCrystal

    280
    Danke öich viu mau, beruhiget mi grad ä chli😊@Gröipschi, richtig ghört😊 i ga ds thun ids spitau
  • NiciNici

    79
    Ich han im 2018 eini gah und Has überhaupt nit schmerzhaft gfunde. S einzige wo ich nit so toll gfunde han das mir unde chli ufgresse het wo Brust ufhört will die Dame so dra umegresse het für die richtig Position. Do chunts gloub scho extrem drufa wer’s macht. Ich han de paar Tag spöter bricht becho und Bilder hends mir hei gschickt. Im März hani ou wieder eini.
  • CrystalCrystal

    280
    Danke für di bricht nici, oje, da isch si nid grad fiin umgange mit dir i dämfau…hoffe dases ds nächscht mau besser geit u das du vorauem guete bricht überchunnsch im märz
  • NiciNici

    79
    Danke Crystal. Ich hoffe bi Dir goht alles guet und bechunsch em guete bricht. Drückter Dümme🍀✊
  • CrystalCrystal

    280
    @Nici, leider het ds dummä drücke nid viu gnützt, ha müesse ä biopsie mache u warte jtz ufds ergäbnis öb dr chnote guet oder bösartig isch😏
  • NiciNici

    79
    @Crystal Ou nei das tuet mir leid z lese. Bis wenn weisches? Hoffe er isch guetartig✊🍀Drücke demfall witer mini dümme🍀✊
  • GröipschiGröipschi

    148
    das duet mer leid @Crystal, drücke d düüme 🍀 bi junge froue isch es hüfig es fibroadenom, ouso öpis guetartigs.
    i muess i öpe 2 wuche o wider go häre ha fürne mammo
  • CrystalCrystal

    280
    Äs isch bösartig😢 has hüt vor ärztin erfahre u chas no gar nid gloube das i söu bruschtchräbs ha
  • CrystalCrystal

    280
    @Gröipschi, hesch de du o öpis gha dasd muesch kontrolliere?
  • livjonalivjona

    178
    Ach Crystal, das duet mer sehr leid. En riese Schock för Dech ond Familie. Chönds denn grad scho operiere ond useschniide ? Brustchrebs chund leider no hüfig vor. D‘Partneri vo mim Schwiegerpapi machts au grad döre. Hed en Chnote entdeckt und denn lah abkläre. Bösartig, grad alles use operiert und nöchst Woche chund die vierti Behandlig 😕
  • Tanja87Tanja87

    791
    @Crystal fühl dich i dem Schock umarmt😓 das tued mier fest Leid!! Viel Kraft und no meh zueversicht für die schweri Ziit🌸🌸 mini Schwiegermutter het vor 1 Jahr s gliiche dure gmacht. Vlt en chline Trost, aber sie hed nachem operiere (nur Tumor entfernt) und em Bestrahle kei Chemo müesse mache. Ich hoffe sehr für dich und dini Familie, das es guet chund🌸 schicke dier nur die beste Wünsch und viel positivi Energie 🦋🪁💜
  • GröipschiGröipschi

    148
    @Crystal duet mer mega leid! isch ä.schissdräck! aber dänk dra, nä cha hüt zu tags so viu mache, es git so viu gueti behandligsmüglechkeite, v.a. we mä öpis früeh/chli entdeckt. i schaffe imne bruschtzäntrum u gseh darum viu so schicksäu, u es chunt sehr viu guet 🍀

    jo i ha voremne haube johr ä chnote entdeckt. i has grad a mim arbeitsplatz chönne ungersueche. mi chef het mi nid wöue frei schpräche, es isch für ihn aber o nüd gsi zum dri stäche. iz söui äbä eifach nachemne haube johr nomou ä kontroue mache.
  • NiciNici

    79
    @Crystal Es tuet mer mega leid dass du de wäg, Behandlig etc. Muesch go. Ich wünsche Dir und dinere Famile ganz vell Kraft und viel Energie. Es isch nit e eifache wäg wo du vor der hesch aber bim Brustkrebs si behandligsmöglichkeite höt afigs sehr guet und vortgschritte. Mis Mami het vor 18 johr ou die Diagnose becho.
  • dixi90dixi90

    174
    Duet mir mega leid. Wünsche dir ganz vöu Chraft und Zuversicht für aues, wo jetzt uf di zuechund 🙏🍀
  • CrystalCrystal

    280
    bearbeitet 21. 01. 2022, 22:44
    Danke viu mau dir liäbä für aui di tröschtändä wort, lieb vo öich

    I ha am friti d operation u muess när bestrahle u ä hormontherapie mache ( wi künschtlächi wächsujahr🙄) aber ke chemo. Isch eifach aus grad chli viu für mi, vorauem wüui zwöi chlini ching ha😢
  • GröipschiGröipschi

    148
    i verschtah das vou, es chehrt ds ganze läbe ufe chopf. machsch es z thun?
    i wünsche aues guete für d op u d behandlige 🍀
  • CrystalCrystal

    280
    Danke gröipschi, ja i maches ds thun, ussert das radioaktive züg muessi ir insu ga la sprütze am tag vor dr op
    Dir wünschi das di chnote so harmlos blibt wi är bis jtze isch oder natürlech ganz vürschwindet✊🏻
  • GröipschiGröipschi

    148
    ah ha no dänkt, muesch sicher ä sentinel markierig mache, u chunsch vilech zu üs (schaffe im ängiried, mir mache das o).

    merci dir! i bi zueversichtlech
  • MietteMiette

    531
    @Gröipschi Schaffe au iner LH-Gruppe. Darf ich dich bzgl. Sentinelmarkierig öppis frage. het mi scho immer wunder gno. Da wird der Draht bis zum Tumor gschobe, wie gseht me denn der Tumor? Teilwis si ja die echt chli & nit mal iner Mammographie erkennbar.
  • MietteMiette

    531
    @Crystal Tuet mer mega leid für dini Diagnose. Aber so wies usgseht, het mes ja recht früeh erkennt & denn hesch ja sicher gueti erfolgsussichte! Drücke dier uf jede fall fescht die dume 👍🏻🍀.
  • CrystalCrystal

    280
    Hoi gröipschi, nei de gseh mir üs nid😊 chasch du mir sägä öb das sehr schmärzhaft isch? Si stächä ja rund um warzehof😏 i ha scho di zwe sprütze fürds betöibä fürd biopsie schmärzhaft entfunde u das isch ja uf dr site vor bruscht gsi…
  • CrystalCrystal

    280
    Danke miette, ja i heig sehr gueti chance wider ganz gsung ds wärdä, wenigschtens das!
  • GröipschiGröipschi

    148
    @Miette ah kuhl, ir pfleg?
    ouso vorwäg, ä sentinelmarkierig u ä drahtmarkierig isch nid ds gliche. dr sentinel wird radioaktiv markiert (ganz weni Radioaktivität wird um d mamille gschprützt, mir mache när biuder, dr sentinel het de am meischte ufgno, mir mache chrüzli uf d hut u im op chöi si de o d Radioaktivität mässe).
    bire drahtmarkierig wird dr draht zum tumor gschobe. wi du seisch gseht mä dä nid, aber di froue hei aui vorhär ä biopsie gha, u dört het mä ä clip inedo, dass mes äbä wider fingt. dä clip isch röntgedicht, mir gseh dä, u de wird dr draht zum clip gschobe. mir düe när aube diräkt nachem/während em ops no quasi dä bitz bruscht röntge u luege, ob dä clip dusse isch, ouso ob si ds richtige areal hei usegno. hoffe ha chönne häufe
  • GröipschiGröipschi

    148
    @Crystal nei es het mer no niemer gseit, dass es gross weh duet. es geit ganz churz, git 4 chlini schtichli. vor mängi här sis nume 0,8ml im gsamte (ämu bi üs), bire lokale anästhesie sis haut öpe 10ml u dr körper reagiert dört druf, dorum ischs unagnähm. d sentinelmarkierig isch quasi nume wasser, wo haut radioaktiv isch, do reagiert dr Körper nid druf.
  • CrystalCrystal

    280
    Danke viu mau gröipschi
  • NiciNici

    79
    @Crystal Ich wünschter für morn alles Gueti und drückter dümme füre ops. ✊✊✊🍀🍀🍀
  • CrystalCrystal

    280
    Hallo Nici, danke viu mau das du a mi dänkt hesch. I bi sit geschter wider dahei vom spitau u äs isch sowit aus guet gange. Am mittwuch si d ergäbnis vor pathologie da u am friti hani de d besprächig mit dr ärztin. I darf nid lüpfe u muess dr arm schone, zwe wuche nid outofahre u ha o rächt weh ir achslä, isch auso grad nid ä so gäbig mit mine zwe chline buebe😏 aber i bi so froh das dr tumor dussä isch
  • GröipschiGröipschi

    148
    schön isch aues guet gange u iz drücki dr d düüme füre witer verlouf 🍀
  • CrystalCrystal

    280
    Danke gröipschi, grad hüt ds ergäbnis vor patho übercho, aus so wi d ärztin agno het u keni böse überraschige vüre cho
Hey! Melde dich an oder registriere dich, um mitzureden.